Yanditswe na: NDAYISENGA Clement
03/06/2026 09:57
Ikigo cy’Igihugu cy'Imisoro n’Amahoro (RRA) cyatangaje ko cyahaye abacuruzi b’ibikomoka kuri peteroli igihe cy’iminsi 30 cyo kuba bakuye mu bubiko lisansi na mazutu imaze amezi arenga atandatu idakoreshwa, ingana n’litiro 1.993.750, kugira ngo isorwe hanyuma ishyirwe ku isoko igurishwe.
Icyo cyemezo cyatangajwe binyuze mu itangazo rya RRA rivuga ko ibi bicuruzwa bigomba kumenyekanishwa, gusorerwa no gukurwa mu bubiko mu gihe cyagenwe.
RRA yanaburiye ko abacuruzi bazananirwa kubahiriza iri tegeko bashobora guhura n’ingaruka zirimo gufatirwa ibicuruzwa byabo, bikazagurishwa n’inzego za gasutamo hakurikijwe amategeko.
Ubwinshi bw’ibikomoka kuri peteroli biri mu bubiko
Urutonde rwashyizwe ahagaragara na RRA rugaragaza ko hari ibikomoka kuri peteroli bingana n’litiro 1.993.750 biri mu bubiko butandukanye mu gihugu, harimo ibigo bikorera i Kigali no mu bindi bice by’igihugu.
Muri uwo mubare, mazutu ni yo ifite igice kinini cyane, ingana na litiro 1.350.000, bigaragaza ko ari yo yari ifite ubwinshi mu bubiko. Lisansi ifite litiro 641.055, mu gihe peteroli isanzwe (kerosene) ingana na litiro 5.065.
RRA ivuga ko ibi bicuruzwa bimaze igihe kirenga amezi atandatu mu bubiko, bikaba byararengeje igihe giteganyijwe n’amategeko agenga imicungire y’ububiko bw’ibicuruzwa bitarasora cyangwa bitaremererwa kujya ku isoko.
Ububiko bwagaragayemo ibyo bicuruzwa
Ibi bikomoka kuri peteroli byagaragaye mu bubiko butandukanye burimo:
• Yussa i Kabuye
• Rubis Energy i Gatsata
• Oilcom i Jabana
Aya ni amwe mu bubiko bukoreshwa mu kwakira no kubika ibikomoka kuri peteroli bitumizwa mu mahanga mbere y’uko bisora cyangwa byemererwa kujya ku isoko.
Ibigo bifite ubwinshi bw’ibikomoka kuri peteroli
RRA yagaragaje n’ibigo bifite umubare munini w’ibikomoka kuri peteroli mu bubiko, birimo:
• Mount Meru Petroleum: litiro 368.998
• Kivu Energy Ltd: litiro 120.361
• Socit Sarl: litiro 65.404
• Ukod Oil Rwanda Ltd: litiro 29.121
• Hashi Energy: litiro 27.132
• China Road: litiro 24.845
• Gulf Energy: litiro 18.398
• Hunan Road: litiro 16.163
• Job Petroleum: litiro 15.232
Uretse ibi bigo, hari n’abandi bantu ku giti cyabo ndetse n’ibigo bito bafite lisansi na mazutu mu bubiko, aho RRA igaragaza ko hari litiro zigera kuri 791.832 zitari zizwi ba nyirazo neza, bikaba bigaragaza imbogamizi mu igenzura ry’ibi bicuruzwa.
Impamvu y’iki kibazo
Abasobanukiwe imikorere y’ububiko bw’ibikomoka kuri peteroli bavuga ko ibi bicuruzwa bikunze kuguma mu bubiko kubera impamvu zitandukanye, zirimo:
ibigo bito bishobora kuba byarahagaritse ibikorwa; ubukererwe mu gusora no kurangiza ibyangombwa bya gasutamo cyangwa ibicuruzwa byaguzwe ariko ntibishyirwe ku isoko ku gihe.
Ibi bituma ibikomoka kuri peteroli bimara igihe kirekire mu bubiko, bikarenga igihe cyemewe n’amabwiriza agenga imicungire yabyo.
Uburyo ububiko bw’ibikomoka kuri peteroli bukora
Ubusanzwe, ububiko bw’ibikomoka kuri peteroli bukurikiranwa n’inzego za gasutamo n’Ikigo cy’Imisoro n’Amahoro. Ibicuruzwa byinjira mu gihugu bibanza gushyirwa muri ubwo bubiko kugeza igihe byishyuriwe imisoro cyangwa byujuje ibisabwa byose kugira ngo byemererwe kujya ku isoko.
Iyo birengeje igihe ntibisoreshwe cyangwa ntibikurwe mu bubiko, bishyirwa mu cyiciro cy’ibicuruzwa bidakurikije amategeko, bityo bikaba bishobora gufatirwa ingamba zidasanzwe.
RRA ivuga ko iki cyemezo kigamije gukuraho ibicuruzwa bimaze igihe mu bubiko no guteza imbere isoko ry’ibikomoka kuri peteroli rikorera mu mucyo.
Iyi minsi 30 yatanzwe igamije guha abacuruzi amahirwe yo kubahiriza amategeko, ariko inabibutsa ko kutabyubahiriza bishobora gutuma ibicuruzwa byabo bifatwa bikagurishwa mu buryo bwemewe n’amategeko, hagamijwe kurinda imisoro ya Leta no kunoza imicungire y’ububiko.
RRA yahaye abacuruzi iminsi 30 yo gushyira ku isoko litiro hafi miliyoni 2 za lisansi na mazutu babitse
Like This Post? Related Posts
