• RDF yakiriye abanyeshuri bo mu Ishuri Rikuru rya Gisirikare ry’u Buhinde

Ingabo z’u Rwanda (RDF) zakiriye ku Cyicaro Gikuru cyazo itsinda ry’abanyeshuri 23 baturutse mu National Defence College mu Buhinde, bari mu ruzinduko rw’amasomo mu Rwanda kuva tariki ya 1 kugeza ku ya 6 Kamena 2026.

Uru ruzinduko rugamije gufasha aba banyeshuri gusobanukirwa uburyo ibihugu bitandukanye byubaka ubushobozi bw’inzego zabyo z’umutekano ndetse n’uruhare rwazo mu kubungabunga amahoro n’umutekano ku rwego rw’akarere no ku rwego mpuzamahanga.

Mu gihe bari ku Cyicaro Gikuru cya RDF, aba banyeshuri bahawe ikiganiro kirambuye ku rugendo rw’ihinduka n’iterambere Ingabo z’u Rwanda zanyuzemo kuva igihugu cyongera kubaka inzego zacyo nyuma ya Jenoside yakorewe Abatutsi mu 1994.

Ikiganiro cyagarutse ku buryo RDF yubatse urwego rw’umwuga rushingiye ku ndangagaciro z’ubunyamwuga, imyitwarire myiza n’ubwitange mu kurinda igihugu no gufasha abaturage.

Abitabiriye uru ruzinduko banasobanuriwe uruhare rukomeye RDF igira mu bikorwa byo kubungabunga amahoro hirya no hino ku Isi, cyane cyane mu butumwa bw’Umuryango w’Abibumbye ndetse no mu bikorwa byo gushyigikira umutekano mu karere ka Afurika.

Hatanzwe kandi ibisobanuro ku ruhare rw’Ingabo z’u Rwanda mu bikorwa byo kugarura amahoro, gukumira amakimbirane no gufasha ibihugu bihanganye n’ibibazo by’umutekano, ibikorwa byatumye RDF yubaka izina rikomeye ku rwego mpuzamahanga.

Ubuyobozi bwa RDF bwagaragaje ko gusangira ubunararibonye n’ibindi bihugu ari ingenzi mu guteza imbere ubufatanye mpuzamahanga no kubaka ubushobozi bw’inzego z’umutekano.

Ku ruhande rw’aba banyeshuri bo mu Buhinde, bashimye uburyo u Rwanda rwashoboye kubaka urwego rw’ingabo rw’umwuga ndetse n’uruhare rugaragara RDF ikomeje kugira mu kubungabunga amahoro n’umutekano ku mugabane wa Afurika no ku Isi muri rusange.

Uru ruzinduko ruri mu bikorwa byo gushimangira umubano mwiza n’ubufatanye hagati y’u Rwanda n’India, cyane cyane mu nzego z’umutekano, amahugurwa no gusangizanya ubunararibonye mu bya gisirikare.

 

Like This Post?

• Share On:

Related Posts

---