Yanditswe na: DUSHIMIMANA Elias
25/10/2023 06:13
Mu ijoro ryo ku wa Kabiri, tariki ya 24 Ukwakira 2023, Nibwo hatangiye gukinwa Umunsi wa Gatatu w’Amatsinda ya UEFA Champions League kuva mu Itsinda A kugeza mu Itsinda D aho Manchester United yabonye intsinzi bigoranye.
Myugariro wa Manchester United, Harry Maguire yaje kubonera igitego iyi kipe ku munota wa 72, cyafashije Manchester United kwikura imbere ya FC Copenhagen mu mukino wabanjirijwe no guha icyubahiro Sir Bobby Charlton, umunyabigwi w’iyi kipe yo mu Bwongereza uheruka kwitaba Imana.
Nubwo Maguire yakoze ibyari bikenewe, intwari y’umukino yabaye Umunyezamu André Onana wakuyemo penaliti yatewe na Jordan Larsson ku ikosa ryakozwe na Scott McTominay ku munota wa nyuma.
Iyi ntsinzi ya mbere mu mikino itatu yagaruriye Manchester United icyizere kuko irushwa inota rimwe na Galatasaray yatsinzwe na Bayern Munich ibitego 3-1 mu mukino wabaye hakiri kare.
Like This Post? Related Posts
