Yanditswe na: DUSHIMIMANA Elias
18/05/2023 08:46
Mu ijoro ryo kuwa Gatatu tariki ya 17 Gicurasi byari ibicika kuri Etihad Stadium, ubwo ikipe ya Manchester City yageraga ku mukino wa nyuma wa Champions League nyuma yo gutsinda isuzuguye Real Madrid ibitego 4-0 mu mukino wo kwishyura wa ½.
Iyi kipe yakatishije itike yo kuzakina umukino wa nyuma uzayihuza na Inter Milan yawugezeho isezereye AC Milan, uteganyijwe kubera Istanbul ku wa 10 Kamena 2023.
Manchester City yari imbere y’abafana bayo 52.313, yatsinze ibitego bine ibifashijwemo na Bernardo Silva (23’, 37’), Eder Militao witsinze (76’) na Julian Álvarez (90+1’) winjiye mu kibuga asimbuye.
Manchester City yakomeje kwandika amateka yo kumara imikino 23 idatsinzwe ndetse ku kibuga cyayo imaze kuhatsindira inshuro 15.
Yinjiye mu mukino ihabwa amahirwe nubwo ubanza wabereye kuri Santiago Bernabeu yari yawunganyije igitego 1-1. Yashakaga kugera ku mukino wa nyuma ku nshuro ya kabiri [nyuma ya 2020-21] mu myaka itatu mu gihe yari ihanganye n’ikipe imaze kwegukana Champions League inshuro 14.
Pep Guardiola nta mpinduka yakoze mu ikipe yifashishije mu cyumweru gishize mu gihe Carlo Ancelotti wa Real Madrid yafashe icyemezo cyo gukinisha Eder Militao utarakinnye ubushize kubera amakarita, asimbura Antonio Rudiger. Uyu yajishe Erling Haaland amubuza kurunguruka mu izamu rya Thibaut Courtois.
