Yanditswe na: DUSHIMIMANA Elias
25/09/2023 15:04
Yanditswe na DUSHIMIMANA Elias
Guverineri w’Intara y’Amajyaruguru Mugabowagahunde Maurice yagaragaje Ikizere ku icika burundu ry’ibibazo byari byugarije abaturage bo mu Ntara y’Amajyaruguru birimo n’udutsiko twari tumaze kuzengereza iyi ntara tutakihabarizwa
Guverineri Mugabowagahunde umaze iminsi mike ahawe inshingano zo kuyobora iyi ntara, avuga ko ibyakozwe n’abayobozi ku bufatanye n’abaturage biri gutanga icyizere n’umusaruro biri kubyara ibikorwa bishimangira ubumwe.
Ibi yabigarutseho mu kiganiro cyihariye yagiranye n’ikinyamakuru Primo dukesha iyi nkuru, aho yagaragaje aho urugendo rugeze rwo gukemura ibibazo yasanze byugarije iyi Ntara birimo n’icy’udutsiko twari tumaze gushegesha iri ntara, agaragaza aho yakuye imbaraga zo kubihagararamo neza no kubishakira ibisubizo byihuse.
Uyu mugabo wari usanzwe akora muri Minisiteri y’Ubumwe bw’Abanyarwanda n’Inshingano mboneragihugu, MINUBUMWE, yahawe kuyobora iyi ntara iri mu bibazo by’urudaca, byiganjemo kwirema k’udutsiko kw’abaturage baho, icuruzwa ry’ibiyobyabwenge byinjizwa mu gihugu biturutse hanze yacyo, izamuka ridasanzwe ry’ibiciro by’ibirayi n’ibindi.
Yanavuze ko mu isesengura ryakozwe basanze n’abayobozi baragize uruhare rukomeye muri ibi bikorwa byashoboraga gusubiza Abanyarwanda mu kaga gakomeye.
Yagize ati “Hari impamvu nyinshi zabiteye ariko cyane cyane uburangare bw’abayobozi. Ntabwo babaye hafi abaturage ngo bikemuke hakiri kare.”
Mugabowagahunde yakomeje avuga ko biriya bibazo byari bimaze kugera ku rwego rukomeye aho bamwe mu bayobozi batari bakibasha kubwira abaturage ngo babumve, anagaruka ku kuba aribo bagize uburangare.
Ati “Hari inyigisho zitatambutse neza ari, niyo mpamvu tuvuga ko abayobozi tutakoze akazi kacu. Ni nayo mpamvu hari abayobozi babifatiwemo, bamwe biba na ngombwa ko bava mu kazi. Uruhare rw’abayobozi muri biriya bibazo rwari ku isonga.”
Akomeza avuga ko mu turere tumwe na tumwe, ikibazo cy’udutsiko n’amatsinda byari bimaze gufata indi ntera, atanga urugero rwo mu murenge umwe basenyemo udutsiko 20, aho bari bagiye bishyira hamwe bashingira ku bintu bitandukanye, birimo amoko, ibyiciro by’ubuzima babayemo n’ibindi.
Yagize ati “ Nko mu murenge wa Kimonyi twahasenye amatsinda 20, y’abantu bari bagiye bishyira hamwe hashingiwe ku moko, ku bavuye muri Congo, ku baturutse muri Uganda, ku bahinzi, ku borozi n’ibindi.”
Avuga ko imbaraga zo gukemura ibi bibazo no kubirandura zaturutse ku mahirwe bagize bagasurwa n’umukuru w’igihugu ubwo yahuraga n’abavuga rikumvikana bo muri iyi ntara, akabaha inama ndetse n’impanuro, bigatuma bitekerezaho bagafata umwanzuro wo kwibohora imigozi yari imaze imyaka myinshi ibaziritse.
Yagize ati “Nagize umugisha mu ntangiriro Umukuru w’igihugu aransura, aratuganiriza atugira inama natwe tugira ibyo tumwemerera kandi byatanze umusaruro ufatika.”
Avuga ko Umukuru w’Igihugu yasize abahaye umurongo w’uko amatsinda afite gahunda yo kwiteza imbere no kuzamurana yashyigikirwa, hakarwanywa abafite gahunda yo gushaka gusubiza Abanyarwanda inyuma.
Avuga ko muri iyi ntara nko mu Karere ka Musanze harimo ibibazo bitandukanye byo konesherezanya, gutema amatungo y’abaturage ariko ko ubu bimaze gucika nyuma y’impanuro z’Umukuru w’igihugu.
Ibibazo byo kwirema kw’udutsiko n’amatsinda byamenyekanye ku wa 09 Nyakanga ubwo mu Karerere ka Musanze, mu Murenge wa Kinigi habaye ibirori byiswe “Iyimikwa ry’umutware w’Abakono,” ndetse bemeza ko hazajya hakusanywa umusanzu wo gufashanya mu rwego rwo kugobokana.
Nyuma y’iminsi mike nibwo Umuryango RPF-Inkotanyi wasohoye itangazo uvuga ko imitekerereze, imigirire n’imyitwarire nk’iyo bigomba guhinduka abanyamuryango babigizemo uruhare bakazahanwa.
Uko iminsi yagiye yicuma nibwo hakomeje kugaragara uburemere bw’ibikorwa bari batangije, bamwe mu bayobozi, abari abayobozi bakomeye barimo uwari Minisitiri w’Ubutegetsi bw’Igihugu, Gatabazi Jean Marie Vianey wandikiye Umukuru w’Igihugu amusaba imbabazi ndetse n’abandi batangira gusezera ku nshingano zabo.
Ku Tariki 10 Kamena 2023, Nibwo Perezida Paul Kagame yashyizeho Guverineri mushya w’Intara y’Amajyaruguru Maurice Mugabowagahunde asimbuye Dancille Nyirarugero wayiyoboraga.
