Yanditswe na: NSANZABERA Jean Paul
03/08/2026 13:49
Abahanzi
b'ibyamamare muri Tanzania, Diamond Platnumz na Zuchu, bakomeje kuvugisha
benshi nyuma yo kwakira imfura yabo y'umukobwa, mu gihe hanashyizwe ahagaragara
urutonde rw'ibikoresho byaguzwe mbere yo kubyara ndetse n'ibyo byatanzwe mu
birori byo kwitegura kwakira umwana.
Mu minsi
mike mbere y'uko umwana avuka, iduka ricuruza ibikoresho by'abana ryo i Dar es
Salaam ryashyize ahagaragara urutonde rw'ibyari biri mu gikapu cya Zuchu ajyana
kwa muganga. Uru rutonde rwahise rukwirakwira ku mbuga nkoranyambaga,
rugaragaza ko amafaranga yakoreshejwe mu kugura ibyo bikoresho yabarirwaga muri
Shilingi za Kenya hafi ibihumbi 37 (KSh 37,000), angana na miliyoni zisaga imwe
z'Amashilingi ya Tanzania.
Urwo rutonde
rwari rugizwe n'ibikoresho 19 by'ingenzi bikenerwa n'umubyeyi n'uruhinja,
birimo: Isakoshi y'uruhu (pure leather bag),Impapuro z'isuku z'abana (diapers),Imyenda
y'uruhinja (rompers, bodysuits na sleeping suits),Amashuka n'ibiringiti
by'umwana,Ingofero n'amasogisi by'uruhinja,Imyenda yo gukuraho amaraso ku
mubyeyi nyuma yo kubyara,Amacupa yo kugaburiramo umwana,Ifu y'amatungo (Aptamil
Newborn Formula)
Ibindi
bikoresho by'isuku n'ubwitonzi bikenerwa ku mwana n'umubyeyi. Mu byari bihenze
harimo isakoshi y'uruhu, imyambaro y'uruhinja n'ifu yihariye y'abana bavutse.
Uretse
amafaranga yakoreshejwe ku bikoresho byo kwakira uruhinja, Diamond Platnumz
yanavugishije benshi ubwo yahaga Zuchu impano y'amafaranga angana na TSh
miliyoni 78, abarirwa muri KSh miliyoni 3.8, mu birori bya baby shower byabaye
mbere gato y'uko umwana avuka. Iyo mpano benshi bayifashe nk'ikimenyetso
cy'urukundo no kwishimira kwaguka kw'umuryango wabo.
Diamond na
Zuchu batangaje ko umukobwa wabo yavutse ku wa 2 Kanama 2026, banyuze ku mbuga
nkoranyambaga aho basangije abakunzi babo ifoto yabo bari kumwe n'uruhinja mu
bitaro.
Mu butumwa
bwabo bagize bati: "Murakaza neza ku isi, marayika wacu muto. Turagukunda
birenze uko amagambo yabivuga."
Inkuru
y'ivuka ry'uyu mwana yakurikiye ibyumweru byari byaranzwe n'ibihuha
n'amakimbirane yavuzwe hagati y'aba bahanzi, ariko bongeye kugaragara bari
kumwe mu birori byo kwitegura kwakira umwana ndetse no mu bitaro nyuma yo
kubyara.
Urutonde
rw'ibikoresho byaguzwe n'ayo mafaranga yatanzwe rwakuruye ibitekerezo
bitandukanye ku mbuga nkoranyambaga. Hari abashimye uburyo aba bahanzi biteguye
neza kwakira umwana wabo wa mbere, mu gihe abandi bavuze ko uburyo bwabo bwo
kwizihiza iki gikorwa bugaragaza ubuzima bw'ibyamamare n'ubushobozi bwabo bwo
gukoresha amafaranga menshi mu bihe by'ingenzi by'ubuzima.
Nubwo
imibare yashyizwe ahagaragara yibanze ku bikoresho byo kwa muganga no ku mpano
ya Diamond, benshi bemeza ko amafaranga yose yakoreshejwe mu birori bya baby
shower, imyiteguro yo kubyara n'ibindi bikorwa bishobora kuba ari menshi
kurushaho, nubwo ayo atatangajwe ku mugaragaro.
