Yanditswe na: NSENGIYUMVA J Damascene
04/06/2026 19:24
Ubushinjacyaha bw’igisirikare cya RDC bwabwiye Urukiko rwa Gisirikare rwa Kinshasa ko urugo rwa Gen Christian Tshiwewe wabaye Umugaba Mukuru w’ingabo rwafatiwemo intwaro nyinshi, ubwo rwasakwaga mu mwaka ushize.
Gen Tshiwewe yatawe
muri yombi muri Nyakanga 2025. Icyo gihe yari umujyanama wa Perezida Félix
Tshisekedi mu bya gisirikare; umwanya yagiyeho mu 2024 avuye ku w’Umugaba
Mukuru w’ingabo.
Ubwo urubanza rwe n’abandi bofisiye bakuru icyenda barimo Gen
Maj Maurice Nyembo wayoboye ibiro bye, bagezwaga mu rukiko kuri uyu wa 4 Kamena
2026, bamenyeshejwe ko bakurikiranyweho ibyaha birimo kugambanira igihugu,
gucura umugambi mubisha no gutunga intwaro binyuranyije n’amategeko.
Ubushinjacyaha bwasobanuye ko kuva mu 2020 kugeza muri Nyakanga
2025, Gen Tshiwewe n’abo bareganwa bateguye umugambi wo gukuraho ubutegetsi bwa
RDC.
Muri iki kirego, Ubushinjacyaha bwagaragaje ko tariki ya 9
Nyakanga 2025, mu rugo rwa Gen Tshiwewe ruherereye muri Komini Gombe mu Mujyi
wa Kinshasa hafatiwe intwaro zirimo 12 za RPG-7, enye za AK-47, esheshatu za
PKM n’amasasu atatu ya PKM.
Hafatiwe kandi ibisasu 46 bya rokete zo mu bwoko bwa ’69 40mm’,
amasasu 4322 yo mu bwoko bwa ‘762x53mm’ akoreshwa n’imbunda ziruta gato AK-47,
isasu rimwe rya ‘762x39mm’ rikoreshwa na AK-47, rokete 18 za 40mm, grenade enye
za ‘40mm Kastor’.
Ubushinjacyaha bwagaragaje ko Gen Tshiwewe yatunze izi ntwaro
n’amasasu atabifitiye uburenganzira.
Ubwo Gen Tshiwewe yatabwaga muri yombi, byahishuwe ko yari afite
umugambi wo kwica Perezida Tshisekedi. Umunyamabanga Mukuru w’ishyaka UDPS riri
ku butegetsi, Augustin Kabuya, yavuze ko uyu musirikare yabyiyemereye.
