Yanditswe na: DUSHIMIMANA Elias
27/08/2023 10:59
Perezida, Emmerson Mnangagwa, usanzwe uyobora Zimbabwe yatangajwe na Komisiyo y’amatora muri iki gihugu, ko yegukanye intsinzi yo kongera kukiyobora muri manda ya kabiri.
Komisiyo ishinzwe amatora muri Zimbabwe (ZEC), yemeje ko Mnangagwa w’imyaka 80, yatsinze amatora ku majwi 52,6% mu gihe uwo bari bahanganye wanahabwaga amahirwe kuri uyu mwanya, Nelson Chamisa w’imyaka 45 yagize amajwi 44%.
Abatavuga rumwe n’ubutegetsi ndetse n’indorerezi mpuzamahanga bahise batangaza ko batanyuzwe nibyavuye muri aya matora, bakavuga ko yakozwe mu buryo butubahirije amahame ya Demokorasi.
Nubwo amashyaka atavuga rumwe na Leta atishimiye iyi ntsinzi, Perezida wa Komisiyo ishinzwe amatora, Justice Chigumba, yabwiye abanyamakuru ko Mnangagwa Emmerson Dambudzo wo mu ishyaka rya ZANU-PF, yatangajwe ko yatorewe kuba Perezida wa Repubulika ya Zimbabwe mu buryo bukwiye.
Chigumba yavuze ko Mnangagwa yagize amajwi arenga miliyoni 2.3, Chamisa akagira arenga miliyoni 1.9.
Ishyaka ZANU-PF ryihariye imyanya myinshi mu matora y’Abadepite, kuko ryegukanye imyanya 136 kuri 210.
Ku wa gatatu no ku wa kane mu cyumweru gishize, Nubwo Abanya-Zimbabwe bazindukiye mu gikorwa cy’amatora ya Perezida wa Repubulika n’ay’Abadepite, ariko hagaragaramo amakosa yo gutangira atinze bituma abatavuga rumwe na Leta, ndetse n’indorerezi zo ku rwego mpuzamahanga bavuga ko hagamijwe kwiba amajwi nkuko BBC ibitangaza dukesha iyi nkuru.
Kimwe mu bituma hari Abatavuga rumwe na Leta nuko bavuga ko imyaka Perezida Mnangagwa amaze ayobora iki gihugu, ubukungu bwacyo butifashe neza bakanamushinja kuba umunyagitugu.
Like This Post? Related Posts
