Ku Cyumweru tariki ya 20 Kanama 2023, Nibwo muri Australia mu murwa mukuru wa Sydney, Ikipe y’Igihugu ya Espagne mu Bagore yegukanye Igikombe cy’Isi cy’Umupira w’Amaguru ku nshuro ya mbere, itsinze iy’u Bwongereza igitego 1-0.

Aya makipe yombi yari ahuje amateka mbere yo kwinjira mu mukino kuko ni bwo bwa mbere yageze ku mukino wa nyuma w’Igikombe cy’Isi mu Bagore.

U Bwongereza batazira"Lionesses" [Intare z’ingore] ni bwo bwahabwaga amahirwe imbere ya Espagne izwi nka "La Roja".

Stadium Australia ni yo yakiriye umukino wa nyuma wakinwe saa Sita z’amanywa, imbere y’abafana 75.000.

Muri uyu mukino, u Bwongereza na bwo bwanyuzagamo bugasatira ariko amahirwe bwabonye ntibwayabyaje umusaruro.

Ku munota wa 13, Umwongerezakazi Georgia Stanway, yahinduye umupira imbere y’izamu ariko Jennifer Hermoso ukinira Espagne araryama awukuraho neza.

U Bwongereza bwakomeje gukora amakosa menshi ari na ko Espagne yabonaga ’coup francs’ nyinshi ariko ntizibyaze umusaruro.

Ku munota wa 18, Olga Carmano wa Espagne yahinduye umupira imbere y’izamu usanga Alba Redondo arawukina ariko Umunyezamu w’u Bwongereza Mary Earps, witwaye neza, awukuramo. Redondo yasonzemo ariko umunyezamu Mary Earps yongera kuwufata neza nta gihunga.

U Bwongereza bwatangiye kwinjira mu mukino, ku munota wa 20, Lauren Hemp yateye ishoti ryiza ariko Umunyezamu wa Espagne Catalina Coll umupira awukuramo.

Ku munota wa 29, Mariona Caldentey, yazamukanye umupira neza awucomekera Olga Carmano atsinda igitego cya mbere.

Amakipe yombi yakomeje gusatirana bikomeye umukino uraryoha ariko Igice cya Mbere kirangira Espagne yatsinze u Bwongereza igitego 1-0.

U Bwongereza bwagarutse mu gice cya kabiri bushaka kwishyura igitego ariko abakinnyi ba Espagne bakomeza kubyitwaramo neza.

Espagne yakomeje kwiharira umupira ari nako yageragezaga uburyo bwinshi imbere y’izamu.

Muri uko kotsa igitutu abakinnyi b’inyuma b’u Bwongereza, Espagne yabonye penaliti ku ikosa ryakorewe Jennifer Hermoso.

Nyuma yo kwifashisha amashusho (VAR), umusifuzi yatanze penaliti ku munota wa 70 ariko Hermoso ayiteye umunyezamu Mary Earps ayikuramo, umupira arawufata arawukomeza.

Umutoza w’Ikipe y’Igihugu y’u Bwongereza, Sarina Wiegman, yakomeje gukora impinduka ariko igitego kirabura.

Muri rusange, umukino warangiye Ikipe y’Igihugu ya Espagne itozwa na Jorge Vilda yatsinze iy’u Bwongereza igitego 1-0 yegukana Igikombe cy’Isi ku nshuro ya mbere mu mateka.

Iki gihugu kandi cyabaye icya kabiri cyegukanye Igikombe cy’Isi mu Bagore, kinagifite mu Bagabo aho byari byarakozwe n’u Budage.

Espagne ni ku nshuro ya gatatu yitabiriye imikino y’Igikombe cy’Isi. Mu matsinda yatangiye nabi kuko yatsinzwe n’u Buyapani ibitego 4-0 ariko iza gusezerera u Busuwisi, u Buholandi na Suède.

Aitana Bonmatí w’Ikipe y’Igihugu ya Espagne yatowe nk’Umukinnyi Mwiza w’Irushanwa, Umunyezamu w’Ikipe y’Igihugu y’u Bwongereza, Mary Earps ni we wabaye uw’irushanwa, mu gihe Umunya-Espagne Salma Paralluelo yabaye Umukinnyi Mwiza ukiri muto.

Espagne yabaye igihugu cya gatanu cyegukanye Igikombe cy’Isi cy’Abagore, ku nshuro ya cyenda iri rushanwa ryakinwaga. Ibindi bihugu byacyegukanye ni Amerika (4), u Budage (2), Norvège (1) n’u Buyapani bugifite rimwe.