Ku wa Kane tariki ya 17 Kanama 2023, Nibwo Ingabo z’Umuryango w’Ubukungu muri Afurika yo mu Majyepfo (SADC) zirimo mu Ntara ya Cabo Delgado muri Mozambique zongerewe manda y’umwaka umwe.

Iyi manda izihawe nyuma y’imyanzuro yafatiwe mu Nama ya 43 y’Abakuru b’Ibihugu bigize uyu muryango yateraniye i Luanda muri Angola ku wa 17 Kanama mu 2023.

Itangazo ryashyizwe hanze na SADC rivuga ko “Abakuru b’Ibihugu bemeranyije ku cyemezo cyo kongera ubutumwa bwa SAMIM Ingabo za SADC zirimo muri Mozambique ho amezi 12. Turashima ubwitange bw’abayobozi b’iyi misiyo n’abasirikare mu kugarura amahoro muri Cabo Delgado mu Majyaruguru ya Mozambique.”

Ku wa 15 Nyakanga 2021 ni bwo Guverinoma ya Mozambique yemeje ko SADC yoherezayo abasirikare bagera ku 2000 mu butumwa bw’amahoro, bwiswe ‘SADC Mission in Mozambique (SAMIM).

Iki cyemezo cyo kongera manda y’izi ngabo gifashwe mu gihe hari amakuru yavugaga ko zishobora gutangira gucyurwa kubera ko umutekano umaze kugaruka.

Uretse ibijyanye no kongera manda y’Ingabo za SADC ziri muri Mozambique iyi Nama y’Abakuru b’Ibihugu yanafatiwemo indi myanzuro itandukanye irimo no kohereza izindi ngabo z’uyu muryango mu bikorwa byo kubungabunga amahoro muri Repubulika Iharanira Demokarasi ya Congo.

SADC yatangaje ko ingabo zayo zizoherezwa mu Burasirazuba bwa RDC zizakorana bya hafi n’iz’Umuryango wa Afurika y’Iburasirazuba zisanzwe muri iki gihugu, aho guhangana nk’uko benshi babitekerezaga.

Muri iyi nama hanzuwe kandi ko Perezida wa Repubulika Iharanira Demokarasi ya Congo, Félix Antoine Tshisekedi, asimburwa na mugenzi we wa Angola, João Lourenço ku mwanya w’ubuyobozi bwa SADC.

Muri Kanama mu 2022 ni bwo Perezida Tshisekedi yagizwe Umuyobozi wa SADC asimbuye mugenzi we wa Malawi, Lazarus McCarthy Chakwera, muri manda y’umwaka.