Ku wa Mbere tariki 31 Nyakanga 2023, Nibwo Ubuyobozi bw’Akarere ka Rubavu bwatangaje ko hakozwe impinduka mu Banyamabanga Nshingwabikorwa b’Imirenge umunani muri 12 igize aka karere, ahanini zishingiye ku kubimurira mu yindi mirenge.

Izi mpinduka zatangajwe zishingiye ku kwimurira Abanyamabanga Nshingwabikorwa bava mu mirenge bakoragamo bajya mu yindi.

Abahinduriwe ifasi yo gukoreramo harimo Nyiransengiyumva Monique wimuriwe mu Murenge wa Nyundo, Uwimana Vedaste wimuriwe i Nyakiriba, Kariba Antoine wimuriwe i Busasamana, Mvano Nsabimana wimuriwe mu Murenge wa Rugerero.

Hari kandi Nkurunziza Faustin wimuriwe mu Murenge wa Nyamyumba, Uwizeyimana Josiane wimuriwe i Kanzenze, Murindangabo Eric wimuriwe i Mudende na Nzabahimana Evariste wimuriwe mu Murenge Cyanzarwe.

Ntihatangajwe impamvu yatumye habaho impinduka muri bibiri bya gatatu by’imirenge yose igize akarere ka Rubavu ariko mu butumwa bamwe banditse ku rukuta rwa Twitter rw’aka karere, bagaragaje ko izi mpinduka zari zikenewe, ibica amarenga ko haba hari ikibazo cy’imiyoborere mu nzego z’ibanze.

Uwitwa Ngenzi yagize ati “Izi mpinduka zigeze no mu tugari twose Rubavu yacu yaba ubukombe mu kwesa imihigo. Twizeye ko mubyumva mukanabigira nko kwitsamura.”

Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho myiza y’Abaturage, Assumpta Ingabire aherutse kubwira Abasenateri ko ubu bahagurukiye ikibazo cy’abayobozi usanga barananiwe inshingano mu gace kamwe ugasanga bimuriwe mu kandi cyangwa mu nshingano zisumbye izo bari barimo.

Yagize ati “Kwimurwa kuko wananiwe akazi, wakoraga muri uyu Murenge ugiye mu wundi Murenge, ntabwo ari byo. Umuyobozi wananiwe gukora inshingano neza ako kazi akwiye kukabisa. Uva muri ako kazi ukajya mu bindi ushoboye cyangwa ushaka cyangwa wishimiye gukora.”

Mu Mirenge 12 igize Akarere ka Rubavu, iyagumanye abanyamabanga nshingwabikorwa bayo ni iya Kanama, Gisenyi, Rubavu na Bugeshi.

Ibi bibaye mu gihe hashize amezi abiri uwari Meya wa Rubavu yegujwe kubera kutuzuza inshingano. Aka karere kari mu myiteguro yo gutora meya mushya.