Yanditswe: na DUSHIMIMANA Elias

Kuri uyu wa Kabiri tariki ya 09 Gicurasi 2023, nibwo inkingi Komite Nyobozi ya FERWAFA yari yegamyeho yahirimye.

Ubwegure bwa IP Umutoni Claudette wari Komiseri ushinzwe Umutekano bwatumye abasigaye bari munsi y’umubare w’abagenwa n’amategeko ko bashobora gufata icyemezo cyo gusesa Inteko Nyobozi ya FERWAFA.

Yakomeje agira ati "Dushingiye ku ngingo ya 42 y’Amategeko Shingiro ya FERWAFA mu gika cyayo cya 7, dushingiye ku ngingo ya 38 y’Amategeko Shingiro, tunejejwe no kubatumira mu Nama y’Inteko Rusange Idasanzwe tariki ya 15 Gicurasi 2023."

Yongeyeho ko iyi Nteko Rusange izaba igamije kugaragariza abanyamuryango ubwegure bwa bamwe mu bari bagize Komite Nyobozi ya FERWAFA, kugena uko inzibacyuho izakorwa mbere y’amatora azaba ku wa 24 Kamena 2023 no kubamenyesha gahunda y’ibikorwa by’amatora.

Ibaruwa y’ubwegure bwa IP Umutoni yanditswe ku wa Mbere, tariki ya 8 Gicurasi, akaba yiyongereye ku bandi bari bagize Komite Nyobozi ya FERWAFA barimo Nizeyimana Mugabo Olivier wari Perezida, weguye ku wa 19 Mata.

Hari kandi Habiyakare Chantal wari Komiseri w’Imari weguye ku wa 21 Mata na Uwanyiligira Delphine wari Komiseri ushinzwe Amategeko weguye ku wa 20 Mata 2023.

IP Umutoni yabererekeye Munyantwali Alphonse muri FERWAFA?

Kwegura kwa Umutoni kuje gusanga amakuru avuga ko Munyantwali Alphonse uherutse kugirwa Perezida wa Police FC, aziyamamariza kuyobora FERWAFA.

IP Umutoni yari asanzwe yaratanzwe na Police FC ndetse nta kipe ishobora kugira abantu barenze umwe muri Komite Nyobozi ya FERWAFA.

Amategeko ateganya ko mu gihe abagize Komite Nyobozi basigaye bari munsi ya 2/3, ihita iseswa.

Komite Nyobozi ya FERWAFA yari yatowe muri Kamena 2021, yari igizwe n’abantu 11. Kuba hamaze kwegura bane muri bayigize, byatumye abasigaye badashobora gufata icyemezo nk’uko amategeko abigena.

Niba Munyantwali Alphonse ari we utegurirwa kuyobora uru rwego rushinzwe umupira w’amaguru mu Rwanda, nta yandi mahitamo yari ahari uretse gusubira ku cyo banze [gusesa Komite] kandi hakagaragazwa ko IP Umutoni bava hamwe muri Police FC ari we ugiye.

Amatora azaba ku wa 24 Kamena yari kuzuza imyanya y’abagize Komite Nyobozi beguye.

Komite Nyobozi izatorwa izaba igizwe n’abantu 13 barimo ba Visi Perezida babiri; ushinzwe Imiyoborere n’Imari ndetse n’ushinzwe Tekinike. Haziyongeramo kandi Komiseri ushinzwe amakipe y’Igihugu nkuko Igihe kibitangaza dukesha iyi nkuru.

Abagize Komite Nyobozi ya FERWAFA yaseshwe:

• Perezida: Mugabo Nizeyimana Olivier [Yareguye]
• Visi Perezida: Habyarimana Marcel
• Komiseri ushinzwe Umutungo: Habiyakare Chantal [Yareguye]
• Komiseri ushinzwe Iyamamazabikorwa no gushaka abaterankunga: Cyamwenshi Arthur
• Komiseri ushinzwe Amarushanwa: Gasana Richard
• Komiseri ushinzwe Umutekano: IP Umutoni Claudette [Yeguye]
• Komiseri ushinzwe Imisifurire: Rurangirwa Aaron
• Komiseri ushinzwe Tekinike n’Iterambere rya ruhago: Nkusi Edmond Marc
• Komiseri ushinzwe Umupira w’abagore: Tumutoneshe Diane
• Komiseri ushinzwe Amategeko: Uwanyirigira Delphine [Yareguye]
• Komiseri w’Ubuvuzi: Lt Col Mutsinzi Hubert