Kuri uyu wa Kabiri 25 Nyakanga 2023, Nibwo i Cairo mu Misiri habereye tombora yarangiye APR FC itomboye Gaadiidka FC yo muri Somalia mu ijonjora rya mbere ry’imikino ya CAF Champions League.

APR FC, yegukanye Shampiyona y’u Rwanda ya 2022/2023, yatomboye Gaadiidka FC yabaye iya mbere muri Somalia.

Mu nzira igana mu matsinda, APR FC itegerejwe kuzahura na Pyramids FC yo mu Misiri, iri mu makipe 10 ahagaze neza ndetse yakuriweho gukina ijonjora ry’ibanze rya CAF Champions League 2023/24.

Gaadiidka FC ni ikipe ibarizwa mu Mujyi wa Mogadishu muri Somalia. Ikinira kuri Banadir Stadium, ifite ubushobozi bwo kwakira abafana 30.000.

Mu mateka yayo yegukanye ibikombe bibiri bya Shampiyona ya Somalia mu 1990 n’iyo iheruka mu 2022.

APR FC ni yo izatangira yakira umukino ubanza uteganyijwe hagati ya tariki 18 na 20 Kanama, mu gihe uwo kwishyura uzakinwa hagati ya tariki 25 na 27 Kanama 2023.

Amakipe 54 yo mu bihugu binyamuryango bya CAF 42 ni yo yitabiriye tombola y’azanyura mu ijonjora ry’ibanze muri CAF Champions League igiye gukinwa ku nshuro ya 60.

Ikipe ya Al Ahly yo mu Misiri ni yo ifite Igikombe cya CAF Champions League giheruka, yegukanye itsinze Wydad Casablanca yo muri Maroc.