Mu ijoro ryo ku wa Mbere, tariki ya 11 Ukuboza 2023, Nibwo Mu Mujyi wa Marrakesh mu gihugu cya Maroc, habereye umuhango wo gutanga ibihembo ku bakinyi bitwaye neza bo muri Afurika, waherewemo Rutahizamu w’Ikipe y’Igihugu ya Nigeria na Napoli yo mu Butaliyani, Victor Osimhen igihembo cy’Umukinnyi Mwiza w’Umunyafurika mu mwaka wa 2023.
Victor Osimhen yegukanye iki gihembo nyuma yo kugira umwaka mwiza cyane mu Ikipe ya Napoli yahesheje Igikombe cya Shampiyona y’u Butaliyani, Serie A, yaherukaga mu myaka 30 ishize.
Uyu mukinnyi kandi yanabaye uwatsinze ibitego byinshi muri iyo shampiyona aho yari afite 26.
Uyu mugabo yiyongereye ku bandi begukanye iki gihembo nka Yaya Touré wagihawe inshuro enye (2011, 2012, 2013 na 2014), Samuel Eto’o (2003, 2004, 2005 na 2010) naho El Hadji Diouf, Nwankwo Kanu na Didier Drogba, Mohammed Salah na Sadio Mané bagitwaye inshuro ebyiri buri umwe.
Byari ibyishimo ku Banyanijeria kuko aribo bihariye iki gihembo kuko no mu bagore cyegukanywe na Asisat Oshoala ukinira FC Barcelone ku nshuro ya gatandatu.
Ibindi bihembo byatanzwe
Umukinnyi Mwiza mu bakina muri Afurika yabaye Tau Percy ukinira Al Ahly SC yo mu Misiri, Fatima Tagnaout wa FAR Rabat aba uwitwaye neza mu bagore.
Umunyezamu mwiza w’umwaka yabaye Yassine Bounou wa Al-Hilal yo muri Arabie Saoudite n’Ikipe y’Igihugu ya Maroc yafashije kugera muri ½ cy’Igikombe cy’Isi.
Mu bakinnyi bakiri bato, Umunya-Sénégal Lamine Camara yabaye umwiza w’umwaka, mu gihe Nesryne El Chad yamubaye mu bagore.
Umutoza w’umwaka yabaye Walid Regragui w’Ikipe y’Igihugu ya Maroc nyuma yo gukora amateka yo kugera muri ½ cy’Igikombe cy’Isi ku nshuro ya mbere mu mateka ku ikipe yo muri Afurika.
Iyi kipe kandi ni yo yabaye iy’u mwaka mu bagabo, Nigeria iba inziza mu bagore. Mu makipe (club), Al Ahly SC yo mu Misiri ni yo yabaye iy’umwaka mu bagabo, Mamelodi Sundowns iba iyitwaye neza mu bagore.
Muri rusange, ikipe y’umwaka muri Afurika igizwe n’umunyezamu André Onana, Achraf Hakimi, Chancel Mbemba, Kalidou Koulibaly, Thomas Partey na André Zambo Anguissa.
Hari kandi Mohammed Kudus, Sofyan Amrabat, Sadio Mané, Mohamed Salah na Victor Osimhen.
Like This Post?
Related Posts
Yanditswe na: DUSHIMIMANA Elias
12/12/2023 07:33
