Yanditswe na: TUYIZERE Mubaraka
06/12/2023 17:57
Ibitego bya Muhire Kevin na Mussa Essenu, bifashije Rayon Sports gutsinda Muhazi United ifata umwanya wa 2 , irushwa inota 1 na Mucyeba APR FC ku mwakanya wa mbere .
Ni umukino ikipe ya Rayon Sports yagiye gukina uziko niwutsinda irasigara irushwa inota 1 n'ikipe ya mbere , ikipe ya Muhazi United yo yari ifite akanyamuneza kuko yaherukaga gutsinda Etincelles FC ibitego 3-1 , ikipe ya Rayon Sports yatangiye umukino ifite inyota y'igitego ariko guhuza hagati y'abakinnyi basatira bikomeza kugorana, ikipe ya Muhazi United yo yategerezaga amakosa Rayon Sports yakora ikaba ariyo yubakiraho uburyo bwo gushaka igitego .
Ni umukino utoroheye Joachim Ojera na bagenzi be bakina mu busatirizi
Iminota 25 ya mbere y'umukino amakipe yombi yakinaga umukino uri kurwego rwo hasi cyane nta buryo bufatika barema ubona ko bwavamo igitego , ku munota wa 29 Rayon Sports yabonye uburyo bwiza imbere y'izamu ariko ishoti rikomeye rya Hertier Luvumbu rica kuruhande gato, ku munota wa 34 Rayon Sports yabonye kufura ku ikosa ryakorewe Joachim Ojera maze yinjizwa neza na Muhire Kevin watsindaga igitego cye cya 2 muri Rayon Sports uyu mwaka w'imikino, ikipe ya Rayon Sports yakomeje gusatira ishaka uko yabona igitego cya 2 , gusa abinyuma ba Muhazi United bakomeza kuba ibamba , igice cya mbere kirangira Rayon Sports iyoboye umukino n'igitego 1-0.
Ikipe ya Rayon Sports yatangiranye igice cya 2 imbaraga nyinshi ndetse ku munota wa 46 , umuzamu wa Muhazi United yatuye hasi Ojera ariko umusifuzi avuga ko nta penalty yabaye , icyemezo abakinnyi n'abakunzi ba Rayon Sports batishimiye, ikipe ya Muhazi United nayo yagarutse ifite imbaraga kuko yashakaga uko yakwishyura igitego , ku munota wa 67 Rayon Sports yakoze impinduka ya mbere ikuramo Youssef Rhab yinjiza Tuyisenge Arsene , ku munota wa 72 Rayon Sports yabonye igitego cya 2 cyatsinzwe na Mussa Essenu, ku mupira wahinduwe neza imbere y'izamu na Tuyisenge Arsene.
Ruremesha Emmanuel n'abasore be ntabwo borohewe n'amatara ya Kigali Pelé Stadium
Ku munota wa 77 , ikipe ya Rayon Sports yari kuba yabonye igitego cya 3, ariko umupira Joachim Ojera yirukankanye intera ndende wenyine ananirwa kuwubyaza umusaruro, Rayon Sports yakomeje gusatira cyane , gusa ikipe ya Muhazi United nayo ikanyuzamo ikabona uburyo bw'igitego ariko ntibubyaze umusaruro, ku munota wa 86 Rayon Sports yabonye uburyo bwiza Tuyisenge Arsene asubizamo umupira wari ugaruwe n'umuzamu wa Muhazi United, ariko umupira yateye ukurwa mu izamu na Mussa Essenu, wari wamaze guhagararamo , ku munota wa 90, Rayon Sports yakoze impinduka ya 2 ivanamo Mussa Essenu yinjiza Charles Bbaale, ari nako bongeyeho iminota 4 , Rayon Sports yakomeje gusatira cyane ariko umukino urangira itsinze ibitego 2-0.
Tuyisenge Arsene, Joachim Ojera na Mussa Essenu bishimira igitego cya 2
